Teroz, chocioż jest przerwa i nima meczów koszykówy, to czasami się spikniymy Zyga, Eda , Biniol i jo. Tak se godomy o starych Polokach, abo o du… Maryni, ale tyż o koszykówie. Abo głównie o koszykówie. Teroz jak nima meczów, to czujymy, że nom jei brakuje i czekomy na nowy sezon. Uni wiedzą, że jo wiym dziebko wiyncy, bo jezdem bliży tegu naszygu Klubu, ale jo tyż za wiela nie wiym, a żeli nawet, to nie byde godoł, bo nie jo jezdem od godania. Czasami tylko dziebko nagrygole, ale tedy, jak cołko wiara już wszystko wiy. Eda godo, że rachuje już dni jak zacznie się nowy sezon i cheba jego brachol Czechu i kuzaj Marych tyż bydom przychodzili, bo roz buli i to sie jeim spodobało. No to feste, bo jak bydzie wiyncy wiary, to lepi sie drze kalafy, zauważył Zyga, guli jo nie moge sie kapnąć, czymu nima chyntnych na szpycowanie i dzie som ci co to całką churmą knaili sie do Areny na mecze koszykówy. Tedy, jak jeszczyk Genas, znaczy sie Kijek groł. Tej, wtrącił się Biniu, a jo żem Kijka pore razy widzioł na meczu, Krajce tyż. Tej, ale wiysz co?, dodał Zyga. Zaś przedtym godali, guli fyrają na mecz bo kcą szpycować na Genasa. No to zaś teroz jak Genas jezd na meczach, to mogą szpycować, ino niech sie sknają.